細價股暴瀉 賊喊捉賊
經濟日報 – 2011年6月22日星期三
【經濟日報專訊】現時金魚缸充斥股價暴跌後的蟹貨，若是有基本因素支持的大價股，仍有望返回家鄉，但若是擺明投機炒概念的細價股，恐怕還是狠心沽出了斷最好。
散戶無端白事走去買細價股，絕大部原因都是以為自己從朋友聽到「堅料」，信到十足十才會真金白銀下注。但若股價暴挫後想找朋友問究竟，朋友往往不是熄電話拒絕接聽，就是大呻自己都是受害者，自言輸了幾多幾多，而會坦白承認根本是騙局的，相信極之罕有。
做莊散貨 變被老闆散貨
Zuji Hong Kong
市場近日就流傳一個賊喊捉賊的故事。話說有某細價股離奇急跌，有捧場客周圍問點解，更走到老闆面前查問發生何事，只見老闆表現異常激動，聲言自己也是受害人，哭訴公司股票可能遭炒家舞高弄低。
但實情是早幾個月前，有人聯絡了一批經紀，透過枱底交出一批幾千萬股票，另加兩三千萬現金，叫他們透過代理人戶口，利用「搓波仔」方式每日交叉買賣，製造成交將股價炒上。其後經紀們發覺，每日買入的股票愈來愈多，問題是細價股多年無炒作，街貨照計不多，沽盤從何而來？老闆自然最大嫌疑。
經紀連同一眾人頭戶口，幾個月下來接了過億元的貨，最終招架不了要斬倉，觸發細價股股價暴瀉，有份搞作的經紀據講幾乎輸身家。原本自己做莊家去散貨給散戶，最終卻是被老闆散貨給自己。
撰文︰蘇麗珍
