周大福金條 近全線斷貨 金價回落 自由行客勁掃
明報
12/20/2011
【明報專訊】近排金價跌番唔少，搞到小琴心郁郁想買番啲金儲下，第時嫁得出嘅話，可以用嚟做嫁妝。早兩日行過周大福（1929）的金舖，諗住入去買番啲金條、金粒咁啦，點知店員姐姐竟然話賣晒，小琴當堂打咗個突。
話就話金價跌，都唔係無貨賣咁誇呀。店員姐姐同小琴講，好多自由行客湧嚟掃清光。梗係啦，要投資的話，買飾金要蝕手工費，點計都係買金條金粒抵啲。
http://easss.com/jewelry/gold
個別分店 10月已斷貨
佢就話，因為要等總公司派貨，有幾多貨量都係今日唔知聽日事。就算入咗貨亦唔一定有，皆因啲自由行一早就嚟掃走。聽聽下，覺得唔多忿氣，一於打去其他分店問下。問齊全港九咁滯，都話無晒貨，金條、金粒全線斷貨咁話。
周大福：日日有補貨
有啲分行仲同小琴講，話10月開始已經斷貨，申請咗個幾兩個月都無貨返。好多客成日打嚟問，但係宜家無貨賣，唯有買住龍鳳鈪、金鏈呢啲飾金。老實講，對鈪點靚都好，一定唔及金條金粒咁紮實，畀到人安全感。
周大福品牌總監陳義邦同小琴講，話臨近年尾，加上新年快到，呢排佢地舖頭都多咗自由行客，趁過年前入貨送禮自用，生意好咗好多咁話。
佢仲話，公司嘅庫存無問題，唔怕無貨賣，仲日日有補貨添。不過，小琴真係問極都冇，唔通真係要買番兩手周大福，嚟當自己買咗？
